**காலங்கள் கடந்த காவியம்… நவீனத் தொழில்நுட்பத்தில் கண்முன் விரியும் பிரம்மாண்டம்!**
சிறுவயதில் கதைப் புத்தகங்களிலும், கார்ட்டூன் சித்திரங்களிலும், திரைப்படங்களிலும், தொலைக்காட்சித் தொடர்களிலும் பார்த்துப் பழகிய இதிகாசத்தை, நவீனத் தொழில்நுட்பத்தின் துணையோடு பிரம்மாண்டமான திரை அனுபவமாக மாற்றியிருக்கிறது ‘ராமாயணா’.
ஒரு இதிகாசப் படத்தின் வெற்றி என்பது அதன் பிரம்மாண்டத்தில் மட்டுமல்ல; அதில் இடம்பெறும் கதாபாத்திரங்கள் ரசிகர்களின் மனதில் எந்த அளவுக்கு உயிர்ப்புடன் பதிகின்றன என்பதிலும்தான் இருக்கிறது.அந்த வகையில், ராமர் கதாபாத்திரத்தில் நடித்திருக்கும் ரன்பீர் கபூர் தனது சாந்தமான முகத்தோற்றம், அமைதியான உடல்மொழி ஆகியவற்றின் மூலம் ராமர் கதாபாத்திரத்திற்கு அழகான பொருத்தத்தை வழங்கியிருக்கிறார். அவரது திரைப்பயணத்தில் இதுவொரு முக்கியமான கதாபாத்திரமாக அமையும் வகையில் தனது நடிப்பை வெளிப்படுத்தியுள்ளார்.
சீதையாக நடித்திருக்கும் சாய் பல்லவி, தனது இயல்பான அழகாலும், தனித்துவமான புன்னகையாலும், உணர்வுகளை வெளிப்படுத்தும் நடிப்பாலும் கதாபாத்திரத்திற்கு உயிரூட்டியிருக்கிறார். மேலும் ராவணனாக நடித்திருக்கும் யாஷ், தனது கம்பீரமான தோற்றம், உடல்மொழி ஆகியவற்றின் மூலம் கதாபாத்திரத்திற்கு தனி அடையாளத்தையே உருவாக்கியிருக்கிறார். அவரது திரை இருப்பு ராவணன் கதாபாத்திரத்தின் வலிமையை உணர்த்தும் வகையில் அமைந்துள்ளது.மேலும், தசரதனாக அருண் கோவில், கைகேயியாக லாரா தத்தா, லட்சுமணனாக ரவி துபே, மண்டோதரியாக காஜல் அகர்வால் எனப் பலரும் முக்கியமான கதாபாத்திரங்களில் நடித்துள்ளனர். ஒவ்வொருவரும் தங்களுக்குக் கொடுக்கப்பட்ட பாத்திரங்களின் தன்மையை உணர்ந்து சிறப்பான பங்களிப்பை வழங்கியிருப்பது படத்தின் மற்றொரு பலம்.
ராமாயணம் போன்ற மாபெரும் இதிகாசத்தைத் திரையில் கொண்டுவரும்போது ஒளிப்பதிவுக்கும் காட்சியமைப்புக்கும் மிகப்பெரிய பொறுப்பு இருக்கிறது. அந்தப் பொறுப்பை உணர்ந்து, காவியத்தின் பிரம்மாண்டத்தையும் அதன் உலகத்தையும் பார்வையாளர்களின் கண்களுக்கு விருந்தாக்கியிருக்கிறார்கள் ஒளிப்பதிவாளர்கள் பங்கஜ் குமாரும் மகேஷ் லிமாயேயும். ஒவ்வொரு காட்சியிலும் வெளிப்படும் காட்சியழகும், பிரம்மாண்டமான பின்னணியும் படத்தின் காட்சியனுபவத்தை அடுத்த கட்டத்திற்கு எடுத்துச் செல்கின்றன.
ஹான்ஸ் ஜிம்மர் மற்றும் ஏ.ஆர்.ரஹ்மான் இணைந்து வழங்கியிருக்கும் பின்னணி இசை, படத்தின் பிரம்மாண்டத்திற்கு மற்றொரு பரிமாணத்தைச் சேர்க்கிறது. காவியத்தின் உணர்வுகளுக்கும், கதாபாத்திரங்களின் முக்கியத்துவத்திற்கும் ஏற்ற வகையில் அமைந்திருக்கும் இசை, திரையில் விரியும் காட்சிகளின் தாக்கத்தை மேலும் வலுப்படுத்துகிறது.
ராமாயணத்தின் கதை ஏற்கனவே பலருக்கும் தெரிந்த ஒன்றுதான். ஆனால், அனைவரும் அறிந்த ஒரு கதையை மீண்டும் சொல்லும்போது, அதை எப்படிப் புதிய அனுபவமாக மாற்றிக் கொடுக்கிறோம் என்பதில்தான் இயக்குநரின் திறமை வெளிப்படுகிறது. அந்த வகையில் இயக்குநர் நித்தேஷ் திவாரி, நவீனத் தொழில்நுட்பம், பிரம்மாண்டமான காட்சியமைப்பு, நட்சத்திரங்களின் பங்களிப்பு ஆகியவற்றை ஒருங்கிணைத்து ராமாயணத்தைப் புதிய தலைமுறையினருக்கும் ரசிக்கக்கூடிய திரை அனுபவமாக உருவாக்கியிருக்கிறார்.
ராமாயண காவியத்தை நவீனத் திரைமொழியிலும், உலகத்தரத்திலான தொழில்நுட்பப் பிரம்மாண்டத்திலும் ,அடுத்த தலைமுறையின் கண்முன் கொண்டு வந்து நிறுத்தியிருப்பதே இப்படத்தின் முக்கியமான சிறப்பு. ஏற்கனவே ராமாயணத்தை அறிந்தவர்களுக்கு பழைய நினைவுகளுடன் புதிய காட்சியனுபவத்தையும், இளம் தலைமுறையினருக்கு ஒரு மாபெரும் இதிகாசத்தைப் பிரம்மாண்டமாக அறிந்துகொள்ளும் வாய்ப்பையும் வழங்கும் படைப்பாக ‘ராமாயணா ’ அமைந்துள்ளது.