Tuesday, November 17

‘ஃபிளாக்’ (FLAG) – திரைப்பட விமர்சனம்

ஒரு சிறுவனின் பயணம்… தாத்தாவின் நீண்ட நாள் கனவு… தேசத்தின் மீது கொண்ட அளவற்ற பற்று!** அன்பையும் பாசத்தையும் நாட்டுப்பற்றையும் அழகாக இணைத்து, ஒரு சிறுவனின் சாகசப் பயணமாக உருவாகியிருக்கிறது ‘ஃபிளாக்’.

பெற்றோரை இழந்த சிறுவன் மோகனவேல் (மாஸ்டர் திஹான்), தனது தாத்தா மிக்கி மக்கிஜாவுடன் வாழ்ந்து வருகிறான். தேசியக் கொடி தயாரிக்கும் இடத்தில் பணியாற்றும் தாத்தாவுக்கு, டெல்லி செங்கோட்டையில் குடியரசுத் தலைவர் தேசியக் கொடியை ஏற்றும் நிகழ்வை நேரில் காண வேண்டும் என்பது நீண்ட நாள் ஆசை. ஆனால், எதிர்பாராத விதமாக அவருக்கு உடல்நலக் குறைவு ஏற்படுகிறது. தாத்தாவின் ஆசையை எப்படியாவது நிறைவேற்ற வேண்டும் என்று நினைக்கும் சிறுவன், அவரிடம் சொல்லாமலேயே வீட்டிலிருந்து பணத்தை எடுத்துக்கொண்டு டெல்லியை நோக்கிப் பயணமாகிறான்.

தனது இலக்கை நோக்கிப் புறப்படும் அந்தச் சிறுவனுக்கு வழியில் பல்வேறு மனிதர்களின் அறிமுகமும், புதுப்புது அனுபவங்களும், எதிர்பாராத சவால்களும் காத்திருக்கின்றன. அறிமுகமில்லாத இடங்கள், புதிய மனிதர்கள் எனப் பல தடைகளைக் கடந்து செல்லும் மோகனவேலால் தாத்தாவின் ஆசையை நிறைவேற்ற முடிந்ததா? அவனது பயணம் எந்த மாதிரியான அனுபவங்களைத் தந்தது? என்பதுதான் படத்தின் மீதிக்கதை.

கதையின் மையக் கதாபாத்திரமான மோகனவேலாக நடித்திருக்கும் சிறுவன் திஹான், தனது இயல்பான நடிப்பால் கவனம் ஈர்க்கிறார். தாத்தாவின் ஆசையை நிறைவேற்ற வேண்டும் என்ற உறுதியுடன் டெல்லியை நோக்கிப் பயணிக்கும் காட்சிகளிலும், வழியில் சந்திக்கும் மனிதர்களிடம் பழகும் தருணங்களிலும் மிகையில்லாத நடிப்பை வெளிப்படுத்தியிருக்கிறார். பாசமும், தேசத்தின் மீது பற்றும் கொண்ட தாத்தா கதாபாத்திரத்தில் நடித்திருக்கும் மிக்கி மக்கிஜாவும் தனது இயல்பான நடிப்பால் கதைக்கு உணர்வுபூர்வமான வலுசேர்த்திருக்கிறார். இவர்களுடன் நடித்திருக்கும் அனந்த், அபிநவ் கோசாமி, பப்புஷா உள்ளிட்டோரும் தங்களுக்குக் கொடுக்கப்பட்ட கதாபாத்திரங்களில் சிறப்பாகப் பங்களித்துள்ளனர்.

ராஜா ரவி வர்மா மற்றும் பாலசுப்பிரமணியம் ஆகியோரின் பின்னணி இசை, சிறுவனின் பயணத்தில் இடம்பெறும் உணர்ச்சிகரமான தருணங்களுக்கு கூடுதல் வலுசேர்க்கிறது. படத்தின் இயக்குநர் எஸ்.பி. பொன்சங்கரே ஒளிப்பதிவையும் கவனித்திருப்பது குறிப்பிடத்தக்கது. தமிழ்நாடு உள்ளிட்ட இந்தியாவின் பல்வேறு மாநிலங்களில் உள்ள முக்கியமான இடங்களை அழகாகப் படமாக்கியிருக்கிறார். இதனால், ஒரு சிறுவனின் பயணத்துடன் சேர்ந்து, இந்தியாவின் பல பகுதிகளையும் சுற்றிப் பார்த்த உணர்வை படத்தின் ஒளிப்பதிவு ரசிகர்களுக்கு வழங்குகிறது.

குழந்தையை மையமாகக் கொண்டு ஒரு எளிமையான கதையைத் தேர்வு செய்திருக்கும் இயக்குநர் எஸ்.பி. பொன்சங்கர், அதனுடன் குடும்பப் பாசத்தையும் ,நாட்டுப்பற்றையும் இணைத்துச் சொல்லியிருக்கிறார். தாத்தாவின் கனவை நிறைவேற்றுவதற்காக ஒரு சிறுவன் மேற்கொள்ளும் பயணத்தை மையமாக வைத்து, வழியில் அவன் சந்திக்கும் மனிதர்கள், அனுபவங்கள், சவால்கள் எனக் கதையை விரிவுபடுத்தியிருக்கிறார். குழந்தைகளுக்குப் புரியும் வகையிலும், பெரியவர்களின் மனதைத் தொடும் வகையிலும் நாட்டுப்பற்றை இயல்பாகக் கதைக்குள் இணைத்திருப்பது படத்தின் சிறப்பம்சமாக அமைந்துள்ளது.

மொத்தத்தில், தாத்தாவின் கனவை நிறைவேற்றப் புறப்படும் ஒரு சிறுவனின் பயணத்தின் வழியாக குடும்பப் பாசத்தையும், நாட்டுப்பற்றையும் உணர்வுபூர்வமாகப் பதிவு செய்திருக்கும் ‘ஃபிளாக்’, குழந்தைகளுடன் குடும்பமாகத் திரையரங்கில் பார்த்து ரசிக்க ஏற்ற ஒரு நல்ல திரைப்படம்!.

Spread the love