ஏழு சிறுவர்கள்… ஒரு கால்பந்து கனவு… அதை நனவாக்க போராடும் ஒரு ஹீரோ! இந்த கூட்டணி வென்றதா என்பதுதான் ‘7 ஸ்டார் பாய்ஸ்’.
கால்பந்தை விளையாட்டாக மட்டுமல்லாமல், வாழ்க்கையின் ஒரு பகுதியாகவே பார்க்கும் ஒரு கிராமம்… அந்த கிராமத்தில் தங்களுக்கென ஒரு மைதானமும், அணியும் வேண்டும் என்ற கனவுடன் இருக்கும் ஏழு சிறுவர்கள். அவர்களின் கனவுக்கு துணையாக களமிறங்குகிறார் கால்பந்து வீரரான ஆண்டனி வர்கீஸ்.அவரது முயற்சியால் ‘7 ஸ்டார்’ என்ற பெயரில் சிறுவர்கள் அணி உருவாகிறது. ஆனால், எதிர்பாராத ஒரு சம்பவத்தால் ஆண்டனி வர்கீஸின் கால்பந்து வாழ்க்கையே தடம் மாறுகிறது. இருந்தாலும், சிறுவர்களின் திறமையை உலகிற்கு காட்ட வேண்டும் என்ற அவரது முயற்சி தொடர்கிறது.இதற்காக கேரளா பிளாஸ்டர்ஸ் நடத்தும் கால்பந்து போட்டியில் ‘7 ஸ்டார்’ அணியை களமிறக்க முடிவு செய்கிறார். இந்திய கால்பந்து முன்னாள் நட்சத்திர வீரர் ஐ.எம். விஜயன், சிறுவர்களின் ஆர்வத்தையும் திறமையையும் பார்த்து அவர்களுக்கு பயிற்சி அளிக்க முன்வருகிறார்.ஒருபுறம் தங்களது கால்பந்து கனவை வெல்ல போராடும் ஏழு சிறுவர்கள்… மறுபுறம் தனது இலக்கை அடைய கிராமத்து செல்வந்தரிடம் சவால் விடும் ஆண்டனி வர்கீஸ். இவர்களின் பயணத்தில் வரும் தடைகள் என்ன? ‘7 ஸ்டார்’ அணி தங்களது திறமையை நிரூபித்ததா? என்பதுதான் ‘7 ஸ்டார் பாய்ஸ்’ படத்தின் மீதிக்கதை.
கதையின் நாயகர்களாக நடித்திருக்கும் ஆண்டனி வர்கீஸ் மற்றும் ஏழு சிறுவர்களும் தங்களது கதாபாத்திரங்களுக்கு ஏற்ற வகையில் சிறப்பான நடிப்பை வெளிப்படுத்தியுள்ளனர். ஆண்டனி வர்கீஸ், சிறுவர்களுக்கு உதவும் ஒரு நண்பராகவும், அவர்களின் கனவுக்கு வழிகாட்டியாகவும் கதையில் நிறைவான நடிப்பை கொடுத்துள்ளார். சிறுவர்களின் கனவு, அவர்களுக்குள் இருக்கும் விளையாட்டு ஆர்வம் மற்றும் அவர்களுக்காக நாயகன் மேற்கொள்ளும் முயற்சிகள் என படத்தின் உணர்வுப்பூர்வமான காட்சிகளில் அவரது நடிப்பு கவனம் பெறுகிறது.
மேலும், கால்பந்தாட்ட வீரர் ஐ.எம். விஜயன், ஜுமானா அப்து ரஹ்மான் உள்ளிட்ட மற்ற கதாபாத்திரங்களில் நடித்திருப்பவர்களும் தங்களுக்கு வழங்கப்பட்ட வேடங்களை உணர்ந்து சிறப்பான பங்களிப்பை வழங்கியுள்ளனர்.
ஒளிப்பதிவாளர் ஃபைஸ் சித்திக், கிராமத்தின் இயல்பான சூழலையும், அங்கு வாழும் எளிய மனிதர்களின் வாழ்க்கையையும் நேர்த்தியாக காட்சிப்படுத்தியுள்ளார். ஜேக்ஸ் பீஜாயின் இசையில் பாடல்கள் கேட்கவும், பார்க்கவும் ரசிக்கும்படி அமைந்துள்ளன. அதேபோல், போட்டி மற்றும் உணர்வுப்பூர்வமான காட்சிகளில் இடம்பெறும் பின்னணி இசை அந்தந்த காட்சிகளுக்கு தேவையான விறுவிறுப்பை கூட்டுகிறது.
கால்பந்தாட்டத்தை மையமாக வைத்து உருவாக்கப்பட்டிருந்தாலும், வெறும் விளையாட்டுப் போட்டியை மட்டும் முன்னிலைப்படுத்தாமல், சிறுவர்களின் கனவு, நட்பு, கிராமத்து மனிதர்களின் உணர்வுகள் மற்றும் அவர்களுக்குள் இருக்கும் ஒற்றுமை ஆகியவற்றையும் கதையுடன் இணைத்திருப்பது படத்தின் சிறப்பு.
எளிய மனிதர்களின் வாழ்க்கையையும், சிறுவர்களின் கால்பந்தாட்ட கனவையும் மையமாக வைத்து அனைத்து தரப்பு ரசிகர்களும் ரசிக்கும் வகையில் படத்தை இயக்கியுள்ளார் இயக்குனர் நிகில் பிரேம் ராஜ்.
மொத்தத்தில், கால்பந்தாட்டத்தின் விறுவிறுப்புடன் சிறுவர்களின் கனவையும், கிராமத்து மனிதர்களின் உணர்வுகளையும் இணைத்து சொல்லும் ஒரு எளிமையான, உணர்வுப்பூர்வமான திரைப்படமாக ‘7 ஸ்டார் பாய்ஸ்’ அமைந்துள்ளது.