**ஒரு இரவு… ஒரு சடங்கு… எண்ணற்ற மர்மங்கள்! உளவியல் போராட்டங்களின் பின்னணியில் ஒரு வித்தியாசமான திரை அனுபவம்!**
ஆஸ்கர் விருதுக்கான இந்தியாவின் பரிந்துரையாக அறிவிக்கப்பட்ட படைப்பாக அறிமுகப்படுத்தப்படும் இப்படம், இசைஞானி இளையராஜாவின் இசையில் உருவாகியிருக்கும் உளவியல் த்ரில்லர். மகாராஷ்டிராவின் பாரம்பரியக் கலாசாரத்தையும், அங்குள்ள மக்களின் வாழ்வியல் நம்பிக்கைகளையும் கதையின் மையமாகக் கொண்டு வித்தியாசமான திரை அனுபவத்தை வழங்க முயற்சித்திருக்கிறது.
மகாராஷ்டிராவின் கிராமப்புறச் சூழலில் புதிதாகத் திருமணமான சுமன் மற்றும் ஆனந்த்ரா (இஷிதா தேஷ்முக், யோகேஷ் சோஹினி) தம்பதியினர் வாழ்வில் நடைபெறும் ஒரு பாரம்பரியச் சடங்குதான் கதையின் தொடக்கப் புள்ளி. ‘கோந்தல்’ எனப்படும் இந்தப் புனிதச் சடங்கு, தீய சக்திகளை விரட்டி, புதுமணத் தம்பதியினரின் இல்லற வாழ்க்கை மகிழ்ச்சியாக அமைய வேண்டும் என்ற நம்பிக்கையில் இரவு முழுவதும் கிராம மக்கள் ஒன்றுகூடி நடத்தப்படுகிறது.
ஆனால், வழிபாடும் நம்பிக்கையும் நிறைந்த அந்த இரவு, மெல்ல மெல்ல மனிதர்களின் மனங்களுக்குள் ஒளிந்திருக்கும் உணர்வுகளையும் ரகசியங்களையும் வெளிப்படுத்தும் களமாக மாறுகிறது. காதல், ஆசை, துரோகம், அதிகாரப் போட்டி எனப் பல்வேறு மனப்போராட்டங்கள் ஒருபுறம் நிகழ, மறுபுறம் எதிர்பாராத மர்மச் சம்பவங்களும் அரங்கேறுகின்றன. ஒரே இரவில் நடக்கும் இந்தச் சம்பவங்கள் எந்தப் புள்ளியில் ஒன்றிணைகின்றன? அந்த இரவின் முடிவில் வெளிப்படும் உண்மைகள் என்ன? என்பதற்கான விடைகள்தான் படத்தின் மீதிக்கதை.
இஷிதா தேஷ்முக், யோகேஷ் சோஹினி, கிஷோர் கதம், நிஷாத் போயர் உள்ளிட்ட நடிகர்கள் முக்கியமான கதாபாத்திரங்களில் நடித்துள்ளனர். கிராமிய வாழ்க்கைச் சூழலில் வாழும் மனிதர்களின் எண்ண ஓட்டங்களையும், அவர்களுக்குள் ஏற்படும் உணர்ச்சிப் போராட்டங்களையும் தங்களது நடிப்பின் மூலம் சிறப்பாக வெளிப்படுத்தியிருக்கிறார்கள்.
அமலேந்து சௌத்ரியின் ஒளிப்பதிவு படத்தின் குறிப்பிடத்தக்க தொழில்நுட்ப அம்சமாக அமைந்துள்ளது. குறிப்பாக, படத்தின் தொடக்கத்திலேயே சுமார் 25 நிமிடங்கள் இடைவெளியின்றி ஒரே ஷாட்டில் படமாக்கப்பட்டிருக்கும் காட்சி வியக்க வைக்கிறது. இத்தகைய நீண்ட காட்சியைத் தொய்வின்றி நகர்த்தியிருக்கும் விதம் பாராட்டுக்குரியது. மகாராஷ்டிராவின் கிராமியச் சூழல், சடங்குகள், இரவின் மர்மமான பின்னணி என அனைத்தையும் தனது கேமரா மொழியில் அழகாகப் பதிவு செய்திருக்கிறார்.
மகாராஷ்டிராவின் பாரம்பரியக் கலாசாரப் பின்னணியில் ஒலிக்கும் இசைஞானி இளையராஜாவின் இசை படத்திற்கு மிக முக்கியமான பலமாக அமைந்துள்ளது. கதையின் களத்திற்கும், காட்சிகளின் உணர்வுகளுக்கும் ஏற்ற இசை, அந்தக் கிராமத்தின் வாழ்வியலுக்குள் பார்வையாளர்களை அழைத்துச் செல்கிறது.
ஒரு கிராமம், ஒரு இரவு, ஒரு பாரம்பரியச் சடங்கு எனக் குறுகிய களத்தை எடுத்துக்கொண்டு, அதற்குள் பல மனிதர்களின் வாழ்க்கையையும் மன உணர்வுகளையும் இணைத்திருப்பது இயக்குநர் சந்தோஷ் தாவ்கரின் முயற்சிக்குப் பலம் சேர்க்கிறது. கிராம மக்களின் நம்பிக்கைகள், உறவுகளுக்குள் மறைந்திருக்கும் ரகசியங்கள், ஆசைகள் மற்றும் எண்ணப் போராட்டங்கள் எனப் பல அம்சங்களைச் சீரான திரைக்கதை காட்சிகளாக வடிவமைத்திருக்கிறார்.
மொத்தத்தில் , வித்தியாசமான கதைக்களம், கலாசாரப் பின்னணி, 25 நிமிடத் தொடர்ச்சியான ஒரே ஷாட் காட்சி, இளையராஜாவின் இசை எனப் பல தனித்துவமான அம்சங்களைக் கொண்ட இப்படம், வழக்கமான பொழுதுபோக்கு சினிமாவைத் தாண்டி ஒரு புதிய திரை அனுபவத்தைத் தேடும் ரசிகர்களுக்கு வித்தியாசமான படைப்பாக அமையும்.